Այսօր պատրաստվում էի հոդված գրել այն մասին, թե ինչպես կարող են սոցիալական ցանցերն ազդել մարդու արդյունավետության, գործելու ցանկության, արագության, արդյունքների հասնելու վրա: Սակայն հասկացա, որ հոդվածը երկար կստացվի, և ընդհանուր միտքն ավելի հեշտ կարող եմ հասցնել պարզ, կարճ մտքերի տեսքով, որոնք մարդը կվերլուծի ինքնուրույն: Այդ պատճառով Ձեզ եմ ներկայացնում 10 մտքեր, որոնք, հուսով եմ, կփոխեն սոցիալական ցանցերի հանդեպ Ձեր վերաբերմունքը:

Կենտրոնացեք

Ուզո՞ւմ եք գործել: Մոռացեք շեղող հանգամանքների մասին և կենտրոնացեք գործի վրա:

Մի համեմատվեք

Սոցիալական ցանցերում մենք հետևում ենք «հերոսների», որոնցից միշտ հետ ենք, եթե համեմատվենք: Դուք կարող եք դառնալ Քըրք Քըրքորյան, բայց եթե ամեն օր նրա հետ համեմատվեք, միայն կճնշվեք, որ ճանապարհի վերջնակետից դեռ այդքան հեռու եք:

Ինքներդ Ձեզ մի խաբեք

Սոցիալական ցանցերում Ձեր կերպարը ոչ մի կերպ չի ազդում իրական կյանքում Ձեր՝ խնդիրները լուծելու ունակության վրա: Այն չի լուծի Ձեր առողջական խնդիրները, չի հանգստացնի Ձեր մարմինն ու մտքերը և չի պարգևի Ձեզ ֆինանսական անկախություն:

Ժամանակը Ձեզ հատկացրեք

Այն ժամանակը, որը հատկացնում եք ուրիշների կյանքին հետևելուն, խլում եք սեփական կյանքը բարելավելու ժամանակից: Արդյունքում ոչ մի կյանք էլ չի բարելավվում:

Խնայեք էներգիան

Մտքերն Էներգիա են խլում: Որքան շատ բանի մասին եք մտածում, այնքան շատ էներգիա եք սպառում:

Համբերատար եղեք

Եթե ուզում եք բարձրացնել սեփական նշանակալիության զգացումը, հասեք արդյունքների իրական կյանքում և Ձեզ կքննարկեն սոցիալական ցանցերում:

Լսեք սեփական ձայնը

Խմբային մտածելակերպը երբեմն խլացնում է սեփական ձայնը: Անջատեք արտաքին ձայները և մտածեք ինքնուրույն:

Տարբերեք ամենակարևորը

Առավոտյան մարդ պետք է արթնանա իր կարևորագույն նպատակի մասին մտքերով: Եթե առաջին բանը, որ Ձեր մտքով անցնում է, սոցիալական ցանցերն են, ուրեմն նպատակն այդքան ուժեղ չէ:

Մտածեք երկարաժամկետ

Սոցիալական ցանցերն ազդում են կոֆեինի պես: Տվյալ պահին դրանք աշխուժացնում են, ապա թուլացնում:

Գործիք մի դարձեք

Կյանքում միշտ ընտրության երկու հնարավորություն կա. կա՛մ մենք ծառայեցնում ենք տվյալ իրը որպես գործիք, կա՛մ ինքներս ենք դառնում գործիք:

Հրաչյա Մանուկյան

Անձնային աճի գծով հեղինակ, ինքնազարգացման թեմայով 5 գրքերի հեղինակ