1. Ազդեցություն ստեղծում եք ինքներդ

Երբեմն կարող է տպավորություն առաջանալ, որ ծխող մարդն ավելի ուժեղ, ինքնուրույն և հետաքրքիր է: Նույնիսկ եթե այդպես է, դա ոչ մի կապ չունի ծխելու հետ: Ուժեղ, ինքնուրույն և հետաքրքիր մարդուն դարձնում են իր գործերն ու բնավորությունը, իսկ դա որևէ առնչություն չունի ծխելու հետ:

2. Հոգ տարեք այլոց մասին

Միայն չծխելով՝ Դուք հոգ եք տանում այլ մարդկանց մասին: Դրանք և՛ Ձեր հարազատներն են, և՛ պատահական մարդիկ: Վերաբերվեք «մի ծխիր»-ին ինչպես «մի վնասիր»-ին:

3. Թեթևացրեք ուղեղի ծանրաբեռնվածությունը

Օրվա ընթացքում մենք այնքան «պարտականություններ» ունենք, այնքան բաների մասին պետք է հիշենք` սնվել, զանգահարել, դեղերը խմել, ատամները մաքրել, չուշանալ աշխատանքից, չմոռանալ շնորհավորել, վճարումները կատարել, մեքենան լիցքավորել, և այլն, և այլն: Մի ծանրաբեռնեք Ձեր ուղեղը ևս մեկ մտածմունքով:

4. Սուրճը ջրի հետ խմեք

Հիշեք՝ լավագույն համադրությունը ոչ թե սուրճ-ծխախոտ, այլ սուրճ-ջուր համադրությունն է: Սուրճը ջրազրկում է, ուստի ջրի այդ պակասըլրացրեք (հատկապես` ամռանը):

5. Դարձրեք Ձեր կյանքն ավելի հետաքրքիր և իմաստալից

Հաճախ ծխելը միապաղաղությունը կոտրելու միջոց է: Այցելեք նոր վայրեր, նոր մարդկանց հետ շփվեք, և պարտադիր չէ, որ դա լինի ճանապարհորդություն: Նոր մտահղացումներ, հոբիներ ձեռք բերեք, նոր ֆիլմեր, ներկայացումներ դիտեք, նոր գրքեր կարդացեք, փոխեք միապաղաղ կյանքը:

6. Մի մոռացեք Կամքի ուժի մասին

Այսօր չի ստացվում թողնել ծխելը, վաղը չի ստացվի դիմակայել որևէ այլ վնասակար սովորության կամ արարքի հանդեպ գայթակղությանը: Դրա մասին դուք այս պահին չեք մտածում, բայց իրավիճակը կգա առանց Ձեզ հարցնելու:

7. Խնայեք գումարը

Օրական ծախսվող գումարը մեկ տարի խնայեք և ոչ մի դեպքում մի ծախսեք: Մեկ տարի հետո կուտակած գումարով Ձեր փոքրիկ գործը սկսեք, ստուգեք Ձեր ուժերն ու երևակայությունը:

8. Խնայեք ժամանակը

Ծխախոտը ձեռքին պահած 5-ական րոպեները փոխարինեք գործերի առաջընթացին ուղղված մտորումների օրական 1 ժամով: Ծխախոտն ավելի լավը չի դարձնում Ձեր կյանքը, գործերը՝ կարող են դարձնել:

9. Ազատեք գրպանը

Գրպանում մի քանի հեռախոս, բանալիներ, դրամապանակ պահելուց բացի դուք ստիպված եք Ձեզ մոտ պահել նաև այդ «ավելորդ» տուփը: Ծխախոտից ազատվելով՝ ինչպես Ձեր ուղեղն է ազատվում մտքերից, այնպես էլ Ձեր մարմինն է ազատվում ֆիզիկական ծանրաբեռնվածությունից, որքան էլ այն չնչին թվա:

10. Տարբերվեք

Հասարակությունը մենք ենք, մեզնից յուրաքանչյուրը: Բայց նույնիսկ գիտակցելով դա՝ մենք ուզում ենք տարբերվել հասարակությունից: Այսօր տարբերվելու ձևը չծխելն է, այլ ոչ թե ծխելը:

11. Երկար ապրեք և վայելեք կյանքը

Կյանքի վերջնակետում բոլոր են պատրաստ իրենց ողջ ունեցվածքը տալ՝ միայն թե մի փոքր էլ ապրեն, ևս մի քանի լուսաբաց դիմավորեն, հարազատների ձայները լսեն, աշխատանքի գնան, զբոսնեն: Մի վտանգեք այդ ամենը:

12. Որոշում կայացրեք ինքներդ

Ես միայն բարձրաձայն մտածում եմ, տալիս Ձեզ մտածելու տեղիք, ես չեմ դատապարտում և մարդկանց տեսակների չեմ բաժանում, ես վստահ եմ, որ ինչ-որ պահի Դուք ինքներդ կվերլուծեք և որոշում կկայացնեք: Ամենալավ պահը որոշում կայացնելու համար՝ հիմա: